مـ خ ـنوق: لماذا يضيع منا المضمون ..؟

سؤال حيرني جدا جدا !!

لية دايما نعمل حاجات حلوة جدا وبعدين نضيع مضمونها بالبحث عن المظهر ؟؟
والموضوع ده انا ملاحظة في كل حاجة تقريبا
مثلا فكرة جميلة جدا وجديرة بالاهتمام والرعاية من الدولة والشعب وهي مستشفى سرطان الاطفال المشهورة بمستشفى 57357 يا سلاااااااام مشروع انساني جدا وحضاري جدا ... بس يا جماعة دي هتتكلف كتير جدا وماله كله علشان خاطر عيون اطفالنا وكنوز الدنيا كلها ما تستاهلش دمعة ألم واحدة من أفقر طفل مريض في مصر مش كدة ولا اية ؟؟ عارفين انا بعتبر المضمون ضاع من هنا ازاي ؟؟ أقولكوا طلعنا في الفضائيات العربية وعملنا شحاتين على المستشفى !!
أيوة شحاتين مصر بمواردها السياحية والبترولية وقناة السويس وبرجال الاعمال وحتى الشعب الفقير مش قادرين نبني مستشفى واحدة ...!!
يا سلاااام انا كواحد من الشعب كان عندي استعداد اوافق انهم يضيفوا ولو عشرة جنية على كل فاتورة تليفون او فاتورة كهرباء او فاتورة مية او غاز لمدة سنة كاملة ولا نظهر بمظهر الشحاتين ده :( اظن ان المستشفى دي اهم من رسوم النظافة اللي ضافوها على الفواتير الكهرباء ومع ذلك الزباله في كل مكان واهم كمان من الزيادات اللي بتيجي على فواتير التليفونات بدون تبرير زيي مثلا بيجيلي نداء آلى وانا معنديش صفر وبيجيلي انترنت مجاني وانا عندي دي اس أل ومعنديش كارت فاكس اساسا في جهازي
مش عارف اية خلاني اتكلم في الموضوع ده كتير بس بصراحة ده اقوى مثل على ضياع مضمون شئ جميل

اجي بقة للموضوع الاساسي هنا

موقع جيران موقع جميل ولذيذ وبيقدم خدمات كتير جدا وأظن هو الموقع رقم واحد عربيا في هذه الخدمات وده شئ جميل ولكن ...... أن أن أأأأأأأأأأأأأأأأأأأأأن :-)

المدونات يا جماعة على حد علمي المتواضع جدا علشان كل واحد يطلع اللي جواه يكتب اللي في قلبة وده كلنا متفقين علية لكن اللي انا شايفة بيحصل هنا شئ تاني
( الاكثر شعبية) هو اية هو اللي اكثر شعبية ؟؟ المقالات الاكثر شعبية والمدونات الاكثر شعبية
الشعبية دي بقة بتتحسب ازاي بعدد الاصدقاء ولا التعليقات ولا الزيارات ولا اية بالظبط ؟؟

وطبعا لاني جديد على مدونات جيران معنديش فكرة واضحة لكن بعد التدوينة التانية عرفت عن طريق واحد معرفوش طبعا بعتلي رسالة فهمني قالي فيها احنا مصريين زي بعض وعايزين مدوناتنا تبقى الاكثر شعبية >>> قلت في عقلي والله فيه الخير .... المهم كمل رسالته بصدمة بقة ..... ضيفني يا اخ مخنوق عندك كصديق وانا هضيفك ونضيف اكتر قدر ممكن من الاصدقاء >>>> اللي انا معرفهمش طبعا ولا هم اصدقائي ولا حاجة ...... وكمل وقال وحاول تعمل اكتر من يوزر وادخل علق على مقالاتي وانا ادخل اعلق على مقالاتك برضوا بأكثر من يوزر علشان نكون الاكثر شعبية ودايما مدوناتنا تكون في صفحة جيران الرئيسية .... !! وخلص كلام صاحبنا على كدة .. !!
يااااااااااااااااااااااااااه بجد صدمة ضيعنا مضمون التدوين في كلام فارغ انا الاكثر شعبية ولا انت ولا حد تاني

نداء الى القائمين على موقع جيران ارجوكم ألغوا موضوع الشعبية ده لان الموقع هيفقد المضمون لان الشعبية دي سباق وهمي في زمن كلمة منقول

ودمتم سالمين