ياااااااااااااااااااااااه انا مش مصدق عينية معقول أخيرا هدون وادخل طائفة المدونون بس لا لا ..... أستنوا انا هحكلكوا الحكاية انا متابع المدونون من مدة طويلة ومن فترة طويلة برضوا قررت اني ادون واسمي مدونتي (مـ خـنوق) بس وبما اني  مواطن مسكين لقيت ان الطيب احسن وقلت لنفسي يابني ركز في شغلك احسنلك ولما تقف على رجلك وتحس انك بقيت بني أدم بجد أبقى دون وأعمل اللي انت عايزة وصرفت نظر عن التدوين واشتغلت (أعمال حرة طبعا) وبرغم كل المعوقات والروتين والذي منه الحمد لله ربنا كرمني ونجحت - حلو طيب يلا دون بقة ياعم - واتوكلت على الله وعملت مدونة على الـ بلوجر ولسة عايز ادون قلت لنفسي انت هتضيع النجاح وتودي نفسك في مصيبة _ أصل أنا عارف نفسي لساني طويل وما بسكتش _ طيب ما تستثمر نجاحك وتتوكل على الله وتتجوز ..... واجلت التدوين وقولت اتجوز الأول وما كدبتش خبر ورحت جاي متجوز :) - الله يبارك فيكوا وعقبالكوا - يلا بقة ندون.... بس استنى حاسب ده الجواز خد كل حاجة طيب هشتغل شوية بس وبعدين هدون - ماشي خلينا ورا الكداب - واشتغلت وظبط نفسي شوية ولسة عايز ادون ......... ألحق دي المدام حامل وتعبانة والشغل ضاغطك أوي ........ يا عم انت فاضي خليك في اللي انت فية قولت مااااااااااااااشي أول ما ولي العهد يوصل بالسلامة هدون ...  ووصل ولي العهد بعد ما طلع روحنا بس الحمد لله على كل حال : ) الله يبارك فيكوا - المهم يلا بقة هموت وأدون - لا حول ولا قوة الا بالله ولي العهد صحته تعبانة شوية وعايز يروح لدكاترة كبار بياخدوا فلوس كتير بس الحمد لله منتوا عارفين منا شغال ومستورة بس اضغط بقة على نفسك يا واد شوية علشان خاطر فلذة كبدك <<<< حلوة فلذة كبدك دي ..... ودلوقتي ولي العهد بقة تمام والحمد لله فقلت كفاية بقة كدة يلا دون .... وفتحت جيران وقولت النبي عربي يا واد وسيبك من الـ بلوجر وجيت أدون وأطلع كل اللي جوايا بصيت لحرمنا المصون والسيد ولي عهدنا الجميل دار في دماغي حاجات كتيييييييييييير وقولت يا واد الطيب احسن واكتب حكايتك مع التدوين مؤقتا لغاية ما تاخودلك جرعتيين جراءة زي المدونين الجامدين اللي بتقرالهم وساعتها تبقى مدون بجد .... ودمتم